चरिकोट, १९ पुस

लामो यात्रापछि दोलखाको दक्षिणी दुर्गमका गाउँमा जस्ताको टहरोमा कष्टकर जीवनयापन गरिरहेका स्थानीयलाई गाउँमा पुगेर पुनःनिर्माण प्राधिकरण जिल्ला समन्वय समितिको सचिवालयका प्रमुख सागर आचार्यले जनतालाई छिटोछिटो स्थायी आवास (घर) निर्माण गर्न अनुरोध गर्नुभएको छ ।

दोलखाका विभिन्न गाउँमा पुगेर आचार्यले हालै जनतासँग भलाकुसारी गर्दै सरकारले तोकेको मापदण्डभित्र रहेर भूकम्प प्रतिरोधी घर निर्माण गर्न स्थानीयवासीलाई सुझाव दिनुभएको हो ।

सचिवालयका प्रमुख आचार्यले जनता जुझारु भएर जुटेर मात्रै भूकम्पपछिको पुनःनिर्माण सम्भव हुने बताउँदै घर निर्माण गर्न सरकारले दिएको अनुदान रकम दुरुपयोग गर्ने अधिकार कसैलाई नभएको बताउनुभयो ।

पुनःनिर्माणको काम सुस्तगतिमा अगाडि बढिरहेको भनी प्राधिकरणको आलोचना भइरहेका बेला प्रमुख आचार्यले भने स्थानीयलाई झकझक्याउन गाउँगाउँमा पुग्नुभएको छ ।

दोलखाको साविक गाविस बोच, लाकुरीडाँडा, मागापौवा, काटाकुटी, फस्कु, शैलुङ्गेश्वरलगायतमा जस्ताको कटेरामा बसेका स्थानीयलाई भेटेर सरकारले दिएको पहिलो किस्ता रकम रु ५० हजार दुरुपयोग नगर्न र सरकारलाई पुनःनिर्माणमा सहयोग गर्न आग्रह गर्नुभएको थियो ।

उहाँको भनाइ सुन्दै स्थानीयले इञ्जिनियर गाउँमा नबसेका कारण घर निर्माणमा ढिलाइ भएको बताएका थिए । आचार्यसँग दोलखाको काटाकुटीका शेरबहादुर श्रेष्ठले आफ्नो परिवार जस्ताको कटेरोमा बस्नु रहर नभई बाध्यता रहेको बताएका थिए ।

श्रेष्ठले आफूलाई घर बनाउने इच्छा भएपनि आर्थिक अभाव भएकै कारण घर निर्माण गर्न नसकेको बताए । उनले गाउँमा बलियो र सुरक्षित घरका लागि इञ्जिनियर गाउँमा बसे आफूहरुलाई घर कस्तो बनाउने भन्नेमा सहज हुने बताएका थिए ।

त्यसैगरी, दोलखाको बोचमा घर निर्माण गरिरहेका रामबहादुर तामाङले सरकारले दिने भनेको दोस्रो किस्ता र तेस्रो किस्ता रकम सहजरुपमा पाउनु पर्ने बताए ।

उनले आचार्यसँग कुरा गर्दै जनताले सजिलै पहिलो किस्ता पाए पनि दोस्रो किस्ता र तेस्रो किस्ताको रकममा झण्झटिलो प्रक्रिया भएको र आफूहरुले बैंकमा दुःख पाएको बताए । आचार्यले बिहीबार र शुक्रबार दुई दिनसम्म स्थानीयको गुनासो बारे गाउँमा जनतासँग अन्तरक्रिया गर्नुभएको थियो ।

आचार्यले पहिलो किस्ता रकम बुझेर घर निर्माणको काम थालेपछि दोस्रो किस्ता रकम लिन कुनै समस्या परे आफूलाई सिधै फोन सम्पर्क गर्न आग्रह गर्नुभएको थियो ।

प्राधिकरणका जिल्ला प्रमुख आचार्य पुनःनिर्माणको अवस्था बुझ्न गाउँ पसेपछि प्राधिकरणका प्रमुखसँग सिधै आफ्ना गुनासो राख्न पाउँदा स्थानीय निकै खुशी देखिन्थे ।

LEAVE A REPLY

Please enter your comment!
Please enter your name here